Munduko gizarte foroetan izan diren azken bileretan sortu den itxaropenaren kariaz, artikulu honek ondorengo lau fenomeno hauetan hartu du abiapuntua: mugimendu zapatista, 2004ean Martxoaren 11ko atentatuen ondoren Madrilen izan zen erreakzioa, 2002an Venezuelan izandako estatu-kolpe ahalegina eta Internet-en azken urteotan ugaritu diren web-gune alternatiboak. Egileak demostratu nahi du, gaurko gizartean Bestelako Eredu Komunikatiboa garatzea posiblea izateaz gainera, guztiz beharrezkoa dela merkatuak ezarri duen mendekotasun horri amaiera eman nahi baldin bazaio, bederen. Eredu berri honek hankaz gora jarri behar ditu komunikazio prozesuan parte hartzen duten elementu guztien zeregin eta funtzioak. Eredu berria indarrean jartzeko botere mediatikoaz jabetzea ez da ezinbestekoa. Areago, zenbaiten iritziz botere horretaz ez jabetzea da irtenbiderik onena. (Artículo en castellano).

Hedabideen jarduerari buruzko eztabaidak pil-pilean jarraitzen du maila nahiz toki orotan. Frantziako Estatuan batez ere zinemagintzari heldutako lan proposamen berriak aurkeztu genizkizuen iragan astean, eta, gaur, Argentinatik plazaratzen den webgune baten (www.lavaca.org) talde sustatzailearen liburu baten berri dakarkizuegu: ‘El fin del periodismo y otras buenas noticias’. Kasu bietan abiapuntua berdina da, hau da, zantzu argiak daude kapitalismoaren eredu mediatikoa nabarmen porrot egiten ari dela erakusteko, baina, kontuz, hondoratze horretatik gizarte aktoreen ahots propioak gailentzen ari baitira, “komunikazioari benetako zentzua emanez”. Filosofia horrexek piztuta, lavaca-k, liburuaz gain, egunkaria plazaratzeari ere ekin berri dio (‘Mu’ izena du). Aurrera, beti, eredu komunikatiboa aldarazten duten ekimenak! Texto en castellano.